Könüllülər üçün “Tullantıdan sənətə” muzeyinə məlumat turu təşkil olunub
06/04/2024 23:51
Yeni Azərbaycan Partiyası Nizami rayon təşkilatının gəncləri və könüllüləri “Yaşıl dünya naminə həmrəylik ili” ilə əlaqədar “Tullantıdan sənətə” muzeyində olublar.
Tur iştirakçılarına “Tullantıdan sənətə” muzeyi haqqında ətraflı məlumat verilib. Bildirilib ki, Heydər Əliyev Fondunun təşəbbüsü və “Təmiz Şəhər” ASC-nin təşkilatçılığı ilə 2012-ci ildən keçirilən Beynəlxalq “Tullantıdan sənətə” sərgisində nümayiş olunan sənət əsərləri 2015-ci ildən bu muzeydə sərgilənir. “Qala” Dövlət Tarix-Etnoqrafiya Qoruğunun ərazisində yaradılan muzeydə nümayiş olunan bütün yaradıcılıq nümunələri tullantılardan yaradılıb.
Ötən müddət ərzində Azərbaycan da daxil olmaqla dünyanın 44 ölkəsindən 180-ə qədər yaradıcı şəxsin ərsəyə gətirdiyi əsərlər muzeyə gələnlərin böyük marağına səbəb olur. Qeyd edilib ki, “Tullantıdan sənətə” muzeyinin yaradılmasında məqsəd tullantıların həcmini azaltmaq, insanların diqqətini ekoloji problemlərin həllinə yönəltmək və tullantılardan təkrar istifadə edərək onların sənət əsərlərinə çevrilə biləcəyini əyani şəkildə göstərməkdir.
